Assam leilung fate humhimna tur agenda party-te'n an nei lo : PVM

Ram dang mi, dan loa lutte laka hma la tura din, Prabajan Virodhi Manch (PVM) chuan inthlanpui lo awm turah political party-te chuan Assam ram leilung fate humhimna turin agenda an nei lo tih an sawi. Inthlanpui an hmachhawn turah political party-te chuan Assam-a pem lutho vote an thlahlel tawh zawk niin an sawi.

PVM convener leh Supreme Court advocate Upamanyu Hazarika chuan Assam movement ṭan a nih hnu khan party zawng zawngte chuan dan loa pem lutte chungchang chu politics-a hamṭhat nan hmangin, Assam leilung fate harsatna sut kian a nih theih nan eng party mahin hma an la lo niin a sawi. Party hotute chu hetiang hmanga eizawngah a puh bawk.

Hazarika chuan kum 2014 inthlan dawn khan prime minister Modi chuan a campaign-naah Bangladesh aṭanga dan loa lut zawng zawngte chu thawn haw vek an nih tur thu a sawi a, mahse, chutianga ti loin NRC neihin awmzia a neih lohna turin CAA dan hman ṭan a ni leh ta zawk a, heng avang hian political party-te chu Muslim pem lutte'n an vote theih nan an intihsiak mek a ni, a ti. Hmarchhak state dangah chuan politics-a an hotute chuan ram leilung fate humhim tura theihtawp an chhuah laiin Assam-ah erawh pem lutte vote umin an hmanhlel hle zawk a ni, a ti.