Sikkim : SDF hotupain hmeichhiate tan 50% reservation a tiam

Sikkim-a eptu pawl, Sikkim Democratic Front (SDF) hotupa leh Sikkim chief minister hlui Pawan Chamling chuan an party-in inthlan lo awm turah hnehna an chang a nih chuan, hmeichhiate tan zirna in sang leh hnaa an luh tam theih nan 50% reservation an siamsak dawn tih a sawi.

Chamling chuan kum 25 ro an rel chhungin an sorkar chuan hmeichhiate chawikân kawngah hna a thawh ṭhat thu a sawi a, sorkarna an siam leh thei a nih chuan an thil lo tihṭhat tawh chu an chhunzawm dawn niin a sawi. Heng bakah hian SDF hmachhawp hrang hrangte a sawi lang bawk a, chung zingah chuan Ribdi-Bareng a Sherpa World Heritage & Culture Centre siamte khualzinte tlawh theih tur hmunhma tam tak siamte pawh a tel a ni.

SDF hotupa chuan West Sikkim-a Soreng leh Geyzing district chu industry hmunpui tura an ruahman thu leh, liquid hydrogen leh semiconductor siam chhuah a nih theih nan hmalak a nih tur thu a sawi. Sorkarna fawng vuantu an nih a, an hmachhawp a hlawhtlin theih chuan hna thar tam tak an siam theih bakah sumdawnna pawhin hma a sawn dawn tih a sawi.