Nagaland-in Livelihood Generation Scheme kalpui

Nagaland sorkar chuan Covid-19 lenga vanga hmun danga inhlawhfaa awm ṭhin, hna thawh chhunzawm theih loh vanga an state-a kir lehte tana eizawnna siamsakna tur, livelihood generation scheme a kalpui. 

He scheme hi North Eastern Council (NEC) bul tuma siam a ni a, NEC hian state sorkar hnenah fund cheng vaibelchhe 2.4 a pe a ni. 

May 22 leh August 6 inkara state dang aṭanga hawte chu he scheme dawng thei tur hian an in register thei a, mi 16,000 vel inziak lut an awm tawh niin  Department of Industries and Commerce-a commissioner and secretary Kekhrievor Kevichusa chuan a sawi. 

Kevichusa chuan Nagaland tana pawimawh sector 20 hnuaiah he scheme kaltlang hian mi 100 emaw, a aia tam emaw chu hna thawhna turin ṭanpuina sum pek phawt an ni dawn tih a sawi a, cheng nuai hnih thleng pek theih a ni ang, a ti. Sector an thlan chhuah zingah hian micro services - courier service, film production, computer repair, food processing leh manufacturing te pawh a tel.