Congress-in MCC bawhchhiaah Manipur sorkar puh

Manipur Congress chuan an state-a rorel lai, BJP kaihhruai sorkar chu Model Code of Conduct (MCC) bawhchhiaah puhin, Chief Election Commissioner of India hnenah lehkha an theh lut.

Election Commission chuan March 16 khan Manipur-a inthlan neih hun tur a puang a, hemi ni aṭang hian MCC chuan party-te leh sorkar chu a phuar ve nghal bawk a ni. MCC hi inthlan hun tur puan a nih aṭanga result puan a nih thlengin hman ṭhin a ni.

Manipur Pradesh Congress Committee (MPCC) thupuangtu Rabi Khan chuan MCC puan a nih hnuah primary zirtirtu 1,140 lak thar an nih thu District Employment Exchange, Bishnupur-in an tarlan thu sawiin MCC bawhchhiatna a ni, a ti. Hemi bakah hian MCC puan hnuah bawk social welfare department pawhin 'Nongthangleima Yaipha Thourang scheme' hnuaia hamṭhatna dil duhte tan dil theih a nih thu hriattirna an tichhuak tih Rabi Khan chuan a sawi bawk.

Rabi Khan chuan March 27 - 31 khan chief minister Biren Singh-a chenna hmunah hmeichhiate'n inhmuh khawmna hun an neih ṭhin thu sawiin, hetah hian MCC kalha chetna a awm ngeia an hriat thu a sawi bawk. He inhmuh khawm an neihah hian vote hui theih nana a thlawna thil sem an rel lai video pawh hmuh tur a awm niin a sawi. Congress lam puhna hi BJP chuan an la chhang let lo a, hemi chungchangah hian thuchhuah engmah an la nei lo a ni.