Sikkim : Congress-in Article 371F siam ṭhat an tiam

All India Congress Committee (AICC) thupuangtu, Mathew Antony chuan Congress-in Lok Sabha inthlanah hnehna an chang a nih chuan Sikkim humhimna atana duan, Article 371F chu engmah tihdanglam loha an hman ṭhin angin an siam ṭhatsak leh dawn niin a sawi.

Mathew Antony chuan Jammu & Kashmir inhung bikna Article 370 tihbo a nih vangin India danpui hnuaia Sikkim inhung bikna, Article 371F pawh a him lo hle tih a sawi a, Sikkim mipuite humhimtu Article venhim chu an party chuan a ngai pawimawh hle tih a sawi. Sikkim Pradesh Congress Committee (SPCC) chairman leh Lok Sabha candidate, Gopal Chettri chuan an party chu Article 371F humhim theitu leh siam a nih tirha a thu ken, tun hnua paih takte dah let leh theitu an nih thu a sawi bawk. Chettri chuan thlan tlin a nih chuan Article 371F tichak lotu central dan ṭhenkhat tidanglam turin hma a la dawn niin a sawi a ni.

Antony chuan prime minister Narendra Modi thutiam leh dawt sawite chu awih lo turin Sikkim mipuite chu a chah a, ramchhunga hna nei lo an pung zel chu BJP sorkar chuan a chingfel thei lo a ni, a ti. Heng bakah hian ni tin mamawh bungruaahte GST an tihsan zel avangin thil man a pun nasat phah niin a sawi bawk.