ENPO-in ECI hnenah inthlan an boycott tur thu an hriattir

Eastern Nagaland People’s Organisation (ENPO) chuan Election Commission of India (ECI) hnenah Lok Sabha inthlan lo awm tur chu an boycott dawn tih ziakin an hriattir. ENPO hian Nagaland khawchhak lam tana Frontier Nagaland Territory (FNT) siam an ngiat a ni.

ENPO thu thlenah hian inthlan an boycott chhan chu democracy an zah loh vang ni loin, Eastern Nagaland mipuite hmathlir a hlawhtlin theih nana India danpuiin a phal ang thlapa hma la an nih zawk thu an tarlang. ENPO leh eastern Nagaland mipuite chuan union home ministry-in an tana rorelna hran a siamsak theih loh avangin inthlan hi boycott tum an nih thu an ziak tel bawk.

Rorelna hran an ngiat thu hi home ministry hnenah vawi tam tak an thlen tih ENPO chuan sawiin, an duhnate tihhlawhtlin a ni ta lo a, Lok Sabha inthlan puan a nih zui vangin Model Code of Conduct-in a phuar ta tih an sawi bawk. An thil ngiat kawngah danin a phal chin chauha hma an lak ṭhin thu an tarlang a, engtik niah emaw chuan sorkar laipuiin Frontier Nagaland Territory (FNT) chu Nagaland khawchhak lam mipuite tan an la siam ngei an beisei tih an sawi a ni.