Sakhuana hmanga politics khelah Arunachal CM-in Congress puh

Arunachal Christian Forum (ACF)-in Lok Sabha inthlan lo awm turah Arunachal East leh Arunachal West-a Congress aiawha ding tur Bosiram Siram leh Nabam Tuki te an thlawp thu an sawi hnuah, Arunachal chief minister Pema Khandu chuan Congress party chu politics-a sakhuana hmang ṭangkai ṭhinah a puh.

Chief Minister Khandu chuan Congress party-in BJP chu sakhuana hmanga politics khelah puh ṭhin mah se, Congress zawk chu hetiang zawnga hma la ṭhin an nih thu a sawi. An state chhungah ngei pawh politics a an hamṭhat nan ACF chu an bêl a ni, a ti. Khandu chuan BJP-in politics an khelh chhan chu hna ṭha thawh nan leh ram hmasawn nana a nih thu sawiin, sakhuana leh politics kaihkawp chu thil pawm harsa tak niin a sawi.

CM chuan state chhunga Kristiante chuan an ngaihtuahna fim tak an hman ngei a beisei thu leh, politics lam thilin an rinna chu tibuai lo se a duh thu a sawi. Congress thil kalpui duh dan chu ṭhangtharte'n an chhui let ang a, dem an la hlawh dawn chauh a ni, a ti.

Congress candidate Tuki-a'n BJP-in an party zawm turin pawisa hmanga midang an thlem ṭhin thu a sawi chu Khandu chuan a chhang let bawk. Khandu chuan he thil hi dâwt a nih thu sawiin, candidate inhnukdawk an tam chhan chu BJP chan a ṭhat vang zawk niin a sawi. Khandu chuan Congress chu bial tam takah candidate an dah loh avangin assembly inthlanah an tan sorkarna siam a harsat tur thu a sawi a, state mai bakah sorkar laipuia sorkarna chang tur chu BJP bawk a ni, tiin a sawi.