Meghalaya Dy. CM-in helpawl nena inbiakna neih a duh

Meghalaya deputy chief minister, Prestone Tynsong chuan an state chhunga helpawl lian tak Hynniewtrep National Liberation Council (HNLC) nena inbiakna neih a duh tih a sawi.

Tynsong chuan HNLC leh state sorkar chu inremna zawnga inbiakna nei turin an la tlai lo niin a sawi a, helpawl lam chuan remna leh muanna a awm theih nana inbiakna neih chungchang chu ngaihtuah ṭha leh se a duh thu a sawi bawk. HNLC lam chuan hetiang zawnga ke pen an tum lo a nih chuan dan anga hmalak mai a ngaih tur thu a sawi nghal bawk.

Deputy CM chuan tunhnaia Ichimati-a tual thihna thleng chungchang pawh sawi langin, tlawmngai pawl lam chu an thu thehdarhah fimkhur turin a chah a, buaina tizualkai thei tur zawnga ṭawng lo hram turin a duh tih a sawi. Tynsong chuan dan rorelna hnuaia awm an nih angin sorkar chuan dan hnuaiah dik takin tual thihna thleng a chhui chian tur thu a sawi a, tlawmngai pawlte chu dawhthei taka nghak turin a duh a ni.