Delhi-a Meitei-te'n Lok Sabha inthlan sawn hlat an ngen

Delhi Meitei Coordinating Committee (DMCC) chuan Manipur-a Lok Sabha inthlan neih hun tur chu sawn hlat an ngen. Manipur-ah hian April 19 leh April 26-ah vote thlak tura ruahman a ni.

DMCC hian Chief Election Commissioner (CEC) leh Chief Justice of India (CJI) hnenah inthlan sawn hla tur hian petition an theh lut. An petition-ah hian an state chhung buaina chu Election Commission of India (ECI)-in inthlan a puan hnuah a ziaawm niin an tarlang a, boruak ralmuang hun chhung rei zawk an neih theih nan inthlan chu sawn hlat an ngen.

Manipur state chhung buaina bakah dan leh hrai zawm ṭhat a nih loh avangin party ṭhenkhat chan a chhiat phah niin DMCC chuan an sawi. Tunhnai lawka Manipur CM leh Meitei hmeichhe tam tak inhmuh khawm chungchangah pawh thil dik tawk lo a awm tih sawiin, hemi bakah hian eptu party candidate-te'n tharum hmanga beih leh vau an tawh reng thu an tarlang bawk. State sorkar chuan mipuite a venhim zawh loh avangin mipuite chuan anmahni invenhim nan ralthuam an lek a ngaih thu an sawi lang bawk.