Tripura : BSF-in smuggler pakhat an kap hlum

Tripura-a Sepahijala district, Bangladesh ramri depa awmah Nilaini zan khan Border Security Force (BSF) chuan smuggler ni ngeia hriat pakhat an kap hlum a, midang pakhatin hliam a tuar bawk.

BSF-in an kah hlum tak hi Shahidul Islam niin a chhungte chuan dan phal loha thil tawlh ruknaah a inhnamhnawih ngai lo niin an sawi. BSF-in smuggler ṭhenkhat an buaipui lai chu thlithlai tura kal ve chauh a ni a, sipai lam hian engmah hriaittir lawk loin an kap ringawt niin an sawi. Inkahna a thlen hnu hian BSF-in an kah fuh pahnihte hi Sonamura Social Health Center panpui an ni a, Shahidul chu a hliam tuar loin a boral ta a ni.

Sepahijala District superintendent of police, Bogati J Reddy chuan Nilaini zan dar 9 leh 9:30 inkar khan mi ṭhenkhatin thil an tawlh ruk chu BSF chuan dan an tum tih sawiin, chumi avang chuan buaina hi a chhuak ta niin a sawi. Reddy chuan "BSF sipai pakhat smuggler lamin an hliam hnuah BSF chuan silai an hmet puak ve a, nunna chan lam chhungte sawi danin Shahidul hian inhnamhnawihna a nei lo an ti a, ṭan lam bik nei loin chhui chian a ni ang," a ti.