Nagaland sorkarin inthlan ni atan chawlh a puang

Nagaland sorkar chuan an state chhunga hnathawkte tan Lok Sabha inthlan vote thlak ni, April 19 chu chawlh a nih thu a puang. State sorkar hnuaia hnathawk bakah private hnuaia thawkte paw'n vote an thlak vek theihna turin chawlh hi an puang a ni. Inthlan ni atana chawlh puan hi, hlawh neia chawlh ni (paid holiday) a ni ang.

Nagaland home department chuan hriattirna hi tichhuakin, Representation of the Peoples Act, 1951 hnuaia section 135B-in a phal angin April 19 chu state chhunga hnathawktu hrang hrang, eng hnuaia mi tan pawn hlawh neia chawlh ni a ni dawn tih an puang. Chawlh hian ni tina inhlawhte pawh a huam tel a, mahni constituency pawn lama hnathawka awmte pawh a huam tel vek tih an tarlang.

Home department hriattirna tihchhuahah hian state chhunga bank leh financial institution hnuaia thawkte paw'n vote an thlak theih nan Negotiable Instruments Act, 1881 (Act, XXVI) hnuaiah hlawh neia chawlh pek an nih thu an sawi. Hetih lai hian hnathawktu, an hnaa an kal loh avanga buaina lian tak chhuak thei leh kal loh avanga an hna chân mai hlauhawmte chu chawlh hian a huam tel lo, an ti thung.