Tripura CM-in party hruaitute hmu

Tripura-a rorel lai, BJP chhunga buaina kal zelah, chief minister Biplab Kumar Deb chuan Nilaini khan Agartala-a CM official residence-ah an party hruaitu ṭhenkhat a hmu. 

BJP MLA eng emaw zat chu CM lakah hian helin, hruaitu thlak an phut a ni. 

CM chuan a nihna aṭanga a ban dawn leh dawn loh chungchangah mipui ngaihdan lak a tum tih a sawi a, mahse central lama party hruaituten public meeting buatsaih a tum hi an ṭhulh tir a, CM dinhmun pawh a chelh chhunzawm zel tur thu pawh an sawi bawk. 

Public meeting a neih theih tak loh avangin Deb chuan a laka rinawm, amah thlawptu party hruaitute a kawm a ni. 

An zingah hian deputy chief minister Jishnu Dev Varm,a education minister Ratan Lal Nath, transport minister Pranajit Singha Roy, food minister Manoj Kanti Deb leh social education minister Santana Chakma-te an tel. Hruaitute hian hruaitu atan an thlawp zel dawn tih pawh an hrilh a ni. 

Party chhunga buaina awmah hian state-in charge Vinok Kumar Sonkar chuan CM atana Deb dah chhunzawm zel a nih leh nih loh chungchangah mipuite ngaihdan lak kher a ngai lo tih a lo sawi tawh. Deb chu CM-ah awm zelin, state mipuite tan a thawk zel dawn a, party chhunga buaina chu party thuneitu sang lamin a chinfel dan a ngaihtuah zawk dawn a ni, a ti.