Manipur CM-in project 8 a hawng

Manipur chief minister N Biren Singh chuan Nilaini khan Senapati district headquarters tlawhin, project pariat a hawn bakah project dang panga tan lungphum a phum bawk. 

Project hrang hrang hawnna inkhawm hi Senapati-a Mini Secre­tariat Complex-ah buatsaih a ni. CM hian Senapati District Hospi­tal tan Pradhan Mantri Bharatiya Jan Aushadhi Pariyojana a hawng ṭha leh bawk a, Chief Medical Officer hnenah ambulance a hlan bawk a ni. 

CM Singh hi deputy chief minister Y Joykumar, Works minister Th. Biswajit leh CAF&PD minister Th. Satyabrata-ten an ṭawiawm. CM-in project lungphum panga a phumna te chu - Liyai Khunou-a 33/11 KV Power Sub-Station siamna tur, Oinam-a 33/11 KV Power Sub Station, PMGSY hnuaia Likhamai - Thiwa kawng siamna, Senapati District Women’s Association tana work-shed siamna leh Makhel-a Protected Historical Site cheiṭhat hna thawhna turte a ni. 

Project hawnna inkhawm neih hnu hian CM chuan district chhunga project leh scheme hrang hrang thawh mek thlirin, review meeting a neihpui leh. 

Hemi hnu hian State cabinet meeting a kaihruia leh nghal bawk. Hei hi Manipur Chief Minis­ter a nih hnua Senapati district head­quarters-a state cabinet meeting an neih ṭum hnihna a ni.