Tripura : Zirtirtu nawr huaihawtten CM rawtna hnawl

Tripura-a tiam chin awm loa nawrh huaihawt mek, zirtirtu aṭanga ban takte chuan state sorkarin rawtna a siam chu an hnawl. 

Thawhṭanni aṭang khan  Joint Movement Committee (JMC) hmingin zirtirtu aṭanga ban takte hian nawrh hi an huaihawt a ni. Chief minister Biplab Kumar Deb chuan nawrh huaihawt mekte hi department hrang hranga hnaruak 9,000 hnawh khahna tura sorkarin notification a tihchhuah chu  dil turin a ti a ni. Mahse  JMC lam chuan he rawtna hi hnawlin, sorkarin an hna ngaia dah let a tiam hma chuan lujngawi lohna hi an lantir dawn tih an sawi. 

JMC joint converner Dalia Das chuan zirtirtu zinga tam tak hi kum rei tak chhung sorkar hnuaiah hian an lo thawk tawh a, ṭhenkhat phei chuan hna thar dil tura kum bithliah pawh an pel tawh a ni, a ti. Hei vang hian CM rawtna siam hi  awmze nei lo a ni, a ti. 

Kum 2002, 2006 leh 2009-a zirtirtu atana lakte chu lak an nih danah thil dik tawk lo a awm nia sawiin High Court-ah khin a ni a, kum 2014 khan Court chuan heng zirtirtute banna tur hi a tichhuak a ni. Supreme Court-ah zualko a ni leh a, mahse Supreme Court pawhin kum 2017 khan High Court thutlukna hi a pawmpui ve leh. Zirtirtu aṭanga ban takte hi an vaiin 10,323  an ni a, mahse state sorkar chuan a hnuah an zinga 1,400 vel chu department dangah a dah lut a, tun thlengin zirtirtu ban tak, hna dang la nei lo  hi mi 8,882 an la awm.