Arunachal-ah BJP sorkar piang mai thei

Arunachal Pradesh chu Presidents' Rule-a puan a nih hnuah Congress sorkar paih thlain People's Party of Arunachal (PPA)-in sorkarna an siam a, chief minister chu Congress MLA hel Kalikho Pul a ni.

Arunachal Pradesh khawpui Itanagar-ah Inrinni khan ni hnih awh BJP Executive Meeting neih a ni a, he huna thusawitu Tamiyo Taga chuan an state-ah BJP sorkar thar a piang mai thei niin a sawi. Taga chuan Arunachal-ah hian BJP sorkar pian theihna a sang hle niin a sawi a, an party chu Nabam Tuki kaihhruai sorkar paihthlatu an nih thu a zep lo. Kalikho Pul-a kaihhruai People's Party of Arunachal (PPA) sorkar chu eng chen nge an thlawp dawn an hriat loh thu a sawi a, sorkar laipui aṭanga thlawpna an hmuh ṭhat leh ṭhat loh chuan kawngro a su viau bawk niin Taga chuan a sawi.

Deputy Chief Ministerial post chu tunah hian BJP lam hian an beisei chho mek niin a lang a, BJP MLA Rumgong chu he hna chelh tur hian an beisei niin media te chuan an tarlang. He mi chungchangah hian BJP President Tapir Gao pawhin media te zawhna a dawng nghe nghe a ni. Gao chuan engmah sawi theih a neih loh thu leh hunin a la hril tur thuin a chhang a ni. Hetih lai hian mi tam tak chuan sorkar laipui aṭanga nawrna a nat chuan Arunachal Pradesh-ah hian politics buaina a chhuah leh mai a rinawm niin an sawi bawk. Gao pawh hian AP-ah hian engtikah emaw chuan BJP sorkar a piang ngei dawn a ni a ti a, hun tur erawh sawi theih a nih loh thu a sawi a ni.

Hetih lai hian Congress lam chuan thawm an lo nei ve mek bawk a, Chief Minister Kalikho Pul leh state Governor JP Rajkhowa te lakah an lungawi lo tih an sawi.

Arunachal Pradesh Congress Committee te chuan Bhim Rao Ambed-kar piancham an lawm a, he hunah hian chief minister paithlak tak Nabam Tuki pawh a tel. Tuki chuan paih thlak a nih danah BJP kaihruai NDA chu a puh a, an thil tih dan chu constitutional principle bawhchiatna a nih thu leh match fixing a nih thu a sawi. Pul-a sorkar chu sum enkawl danah felfai tawk lo a awm niin a sawi bawk a, Chief Minister Universal Health Insurance Scheme sum chu pawhpen a ni,a ti.

Congress hruaitu dang pawhin thu sawiin BJP leh Kalikho Pul chetdan an dem thu an au chhuahpui hlawm a ni. Speaker Nabam Rebia chuan, "January 26 khan Modi chuan thilpek min hlan a, chu chu President Rule a ni", a ti. Lok Sabha Congress MP Ninong Ering, former MP Takam Sanjoy leh APCC president Padi Richo te pawhin he hunah hian thu an sawi a ni.