Imphal Municipal Corporation inthlan a hnai

Manipur-a political party hrang hrang te chu Imphal Municipal Corporation (IMC) inthlan June 2-a neih tur atan an inbuatsaih chho ṭan mek. Rorellai Congress bakah BJP leh party dangte chuan election campaign an ṭan tawh a, Congress leh BJP te chu thawm nei lian ber an ni leh mek.

Imphal Municipal Corporation (IMC) election hi ward 27-ah neih a ni dawn a, he mi chungchangah hian April 15 khan Cabinet meeting neih a lo ni tawh a ni. Final electoral roll chu May 2 hian tlangzarh tur a ni ang a, public notice May 12-ah tih chhuah niin, nomination paper theh luh hun chu May 17 thleng hawn a ni ang. May 18-ah nomination paper te hi endik a ni dawn a ni.

Inthlan hi June 2-ah neiin, zing dar 8 aṭangin vote thlak a ni ang a, tlai dar 4 thleng hawn a ni ang. Harsatna emaw buaina thleng emaw a awm a, inthlan ṭhat ngai a awm a nih chuan June 4-ah neih leh a ni ang.

Vote tla te hi June 6-ah chhiar a ni ang. Manipurah hian IMC inthlan hi kum 1995, 2001, 2006 leh 2011 khan neih a lo ni tawh a, Manipur Municipality Act, 1994 din a nih hnua IMC inthlan vawi ngana tur a ni dawn a ni.