Maneka-in sapel thin titawp turin China ngen

Union Minister for Women and Child Development, wildlife activist ni bawk Maneka Gandhi chuan China sorkar chu hmarchhak huam chhunga sapel ṭhin te chu khuahkhirh turin a ngen.

Maneka hian Shillong-a regional conference on child adoption a hmanpui a, thu sawiin hmarchhak-ah hian nungcha tam tak a awm a, hengte hi humhalh an ngaih tak zet tih sawiin, dan loa sapel ṭhin te kut atanga chhanhim an ngai a ni, a ti. China aṭang hian sapel ṭhin te chuan dan loin India rama ramsa hlu tak tak samak, satel, sakei te chu an pel ṭhin tih sawiin, China sorkar chu titawp thuai turin a ngen. Heng ramsa te hi India ramah pawh an vang tawh hle a, humhalh zual ngai bik te an ni hlawm. A bik takin Samak ki pakhat nei phei hi chu hmuh tur pawh a awm zen zen tawh lo. Assam-ah tlem azawng chu humhalh an la ni a, mite ngaihhlut pawh a hlawh hle.

Tun thla tir lam khan Prince William leh Kate Middleton te chuan heng samak te hmu tur hian Assam-a Kazirangga Natuional Park chu an pan vang vang a, nimahsela an awm lai ngei hian sapeltute chuan Samak hi an kap hlum leh a ni. Samak hi kahhlum a nih hnu hian a ki chu lain sapeltute hian a ruang hi an kalsan a, sahuan vengtute chuan a tuk zingah an hmu chauh a ni.

Karnataka-a factory pakhat-ah chuan plastic keychain-ah rannung an dah hmuh chhuah a ni a, heng hi China-a thawn chhuah tur a ni. Minister chuan heng thil te hi tih loh tawp tur a nih thu sawiin, nungcha atanga ṭthil siam chhuah te chu khuahkhirh a hun tawh tak zet a ni, a ti. India chuan China
aṭanga sapel thin te hi a dolet tur a ni a ti bawk a, hemi tur hian ṭanrual a ngaih thu a sawi.