Tripura-ah Bandh huaihawt a ni

Tripura-ah Thawhṭanni khan darkar 24 awh bandh huaihawt a ni a, nunphung a ti khaihlak nasa hle.

Tripura health minister hlui Bimal Sinha that a nih dan leh chhuizui kawngah sorkar laka an lungawih loh avangin Congress leh a thurualpui opposition te chuan bandh hi an huaihawt a ni.

Congress supporter panga leh CPI-M mi ṭhenkhat te chu police nen an innawrna-ah hliam an tuar. Northern Tripura-a Kamalpur-ah police leh bandh huaihawttute hi an innawr buai a, boruak a ṭang hman hle niin an sawi. Bandh hi Central Bureau of Investigation-in Sinha thihdan a chhui danah an lungawilohna lantirna a nih thu leh Yusuf Commission report hun rei tak chhung sorkarin an puanzarh loh avanga huaihawt an nih thu oppositin lam chuan an sawi. State Chief Minister Manik Sarkar chu a nihna aṭanga bang turin an phut bawk.

Hmun ṭhenkhatah chuan dawr leh sumdawnna hmun te chu hawn tho a ni a, sorkar pisa ṭhenkhat chu hawn a nih thu police thupuangtu Uttam Bhowmik chuan a sawi. Hetih lai hian zirna in te chu khar vek a ni a, mimal leh sorkar motor tlan hmuh tur a awm lo a, Congress mi 500 vel te nawrh huaihawt vang hian man an ni a, an zingah hian state party chief Birajit Sinha, MLA Gopal Roy leh Congress hruaitu hlun Pijush Biswas te an tel.

Health Minister hlui thih dan chhui tur hian Calcutta High Court Justice M.A. Yusuf-a kaihhruainain Judicial inquiry commission din a ni a, January 2000 khan Tripura sorkar hnenah hian Yusuf Commission Report chu pek a ni. Mahse sorkar chuan kum 15 chuang zet mipui hriat loha a ngawihbopui hnuah kumin state assembly budget session-ah khan eptu lam chuan an sawi chhuak a, sawi zui a hlawh hle. Opposition lam hian report chu house-ah sawiho phutin House an chhuahsan a, Speaker-in budget session zawhni-ah sawiho a nihn tur thu a sawi. Eptu lam chuan sorkar chu na takin a bei chhunzawm zel, bandh an huaihawt chhan ber pawh hi a ni. Bimal Sinha leh a unaupa te hi kum 1998 khan Northern Tripura-a Kamalpur-ah National Liberation Front of Tripura te chuan an kaphlum a ni.

Bandh hi a hlawhtling thawkhat niin Sinha chuan a sawi a, mipuiten an thlawp ṭha hle a ni. Hetih lai hian CPI-M central committee member Bijan Dhar chuan Congress party chet dan chu a dem thu sawiin, health minister hlui thihna chungchanga an party an puhna te chu dawt pumhlum a ni, a ti a. finfiahna an nei a nih chuan engvangin nge judicial commission hnenah an pek mai loh, tiin a zawt leh bawk.

CPI-M State secretary Dhar pawhin Congress leh a thurualpuite chetdan chu a dem thu a sawi ve bawk a, an bandh huaihawt chuan zawm a hlawh lo niin a sawi.