Meghalaya : PHE department bungraw dah khawmnaah kangmei chhuak

Meghalaya Public Health Engineering (PHE) department bungraw dah khawmna, Lumshyiap-Chandmari, Shillong-ah Inrinni tlai khan kangmei a chhuak. PHE executive engineer, A Sunn chuan bungrua nuai 80-85 hu vel kangmei chuan a tihchhiat thu a sawi.

Kangṭhelhtute chuan a bul hnaia ram kangin PHE bungraw dah khawmna hmun chu a kangkai tel niin an sawi. Bungraw dah khawmnaah hian plastic pipe (High Density PolyEthylene/HDPE pipe) tam tak a awm avangin kangmei chu ṭhelh a harsat phah niin an tarlang bawk. Veng chhunga chengte'n kangmei a chhuak tih an hriat hnuah rang takin Meghalaya Fire and Emergency Services hnenah an hriattir nghal vat a, hun eng emaw chen hnuah kangmei hi an ṭhelh mit thei ta a ni. Meghalaya Energy Corporation Limited (MeECL) chuan kangmei a chhuak tih an hriat hnuah chhiatna nasa zawk a thlen loh nan êng pek chhuah chu an titawp nghal a, kangmei ṭhelh a nih hnuah êng hi an pe chhuak zui nghal a ni.

PHE department lam chuan tun hnua hetiang thil a thlen tawh loh nan an bungraw dah khawmna hmun hi hung an rel niin an sawi. Ram kan chhan hi hriat a la nih loh thu sawiin naupang mei hmanga infiamten ram hi an tikang palh ta ni a hriat a ni a, a chhan dik tak erawh chhui chian mek a nih thu an sawi.