Assam : CEO-in insawi fiah turin BJP hriattir

Communist Party of India -Marxist (CPI-M) chuan Assam-a rorel lai Bharatiya Janata Party (BJP) chu Model Code of Conduct bawhchhiaah an puh. CPI-M bakah hian Congress party pawhin BJP lakah hian ziakin Chief Electoral Officer hnenah compliant an theh lut ve bawk. Hei vang hian CEO chuan BJP hi insawi fiah turin a hriattir.

CPI-M chuan BJP chuan socio-economic survey chhuanlamah hmangin mipui data an la khawm a, an tum tak tak erawh Orunodoi scheme hnuaia hamṭhatna dawngtu tur tam zawk thlan chhuah a ni, an ti. BJP chuan hemi atan hian dilna form pawh an pe chhuak tawh nia sawiin, scheme hnuaia hamṭhatna dawngtute chu a tam zawk thlan chhuah an tum a ni. BJP-in form an sem chhuahah hian prime minister Narendra Modi leh Assam chief minister Himanta Biswa Sarma thlalak a chuang a, hei hi thil fel lo tak leh MCC bawhchhiatna niin an tarlang.

Assam Chief Electoral Officer (CEO) office chuan mi zawng zawng huap thutiam leh hamṭhatna tiama campaign chu phal ni mah se, tute tan bik emawa survey neih leh dilna form sem chhuah bakah data khawn khawm chu voter-te hruai kawi thei thil a nih avangin phal loh a nih thu an tarlang. BJP laka complaint an dawnte uluk taka zir chian a nih hnuah BJP star campaigner thlalak dilna form-ah a chuan avangin MCC bawhchhiatna a awm thei ngei niin an sawi.

Assam CEO hian kar liam ta Zirtawpni khan BJP chu ziaka insawi fiah turin a hriattir a, tukin zing dar 10 ral hma ngeiin an insawi fiahna theh lut turin state BJP president chu a hriattir a ni. CEO office thuchhuah chuan MCC bawhchhia nia puhna avanga an hrem loh chhan ziaka sawi fiah turin state BJP chu an hriattir a ni.