Nagaland : Ruihhlo leh ralthuam kawl thubuai avangin mi 37 man

Nagaland police chuan ruihhlo do beihpui an thlak mekah hlawhtlinna an chan chhunzawm zel a, Lok Sabha inthlan puan a nih hnu, March 16 aṭanga March 31 inkar khan drugs leh a kaihhnawih thubuaiah mi 12 an man tawh tih an tarlang. Nagaland hian an state chu ruihhlo laka fihlim tura siam an tum a ni.

Nagaland-ah hian ruihhlo, a bikin damdawi ruih chi leh Indian Made Foreign Liquor (IMFL) a hluar hle a, ruihhlo do beihpui pawh thlak mek a ni. Nagaland police chuan March 16-31 inkar hian lirthei leh mi in an dap ṭhin thu sawiin, hemi bakah hian ruihhlo an zuar em tiin hotel leh restaurant-te pawh uluk taka en fiah ṭhin a nih thu an sawi.

Police-te chuan drugs avangin case hrang hrang pakuaah mi 12 an man thu an tarlang a, hemi kaihhnawihah hian ruihhlo chi hrang hrang an man tel thu an tarlang. Hemi bakah hian IMFL kaihhnawih thubuai 18 aṭangin mi 22 an man thu an tarlang bawk. Hemi hun chhung vek hian ralthuam kawl avangin mi pathum chu man an ni bawk.

Nagaland Police chuan mipuite hnenah ngenna siamin ruihhlo kawl emaw zuar emaw an hria a nih chuan police station emaw narcotic police station hnai berah emaw hriattir turin an ngen. Hetiang hmanga an hriattir duh lo a nih pawhin 'Call Your Cop' mobile app emaw 'Made in Nagaland' platform-ah emaw hriattir theih a nih thu an sawi a, police hnenah hriattirtute chu an nihna thupsak an tiam bawk a ni.