Manipur aṭangin Kerala-ah buhfai dum thawn chhuak

Manipur aṭangin buhfai chi khat, a rawng dum leh rimtui avanga ngainat hlawh em em 'Chak-hao' an tih chu metric ton nga Kerala-ah thawn thlak a ni. Hemi bakah hian metric ton 20 chu Europe lama thawn turin ruahhman mek a ni bawk.

Kerala-a Chak-hao thawn thlak tur hi Freshiesfresh, Nahakpam Food and Beverages, Chingmeirong aṭangin Agriculture Department leh Economic and Resource Development Organisation (ERDO) hotute chuan an vai liam a ni.

ERDO secretary leh entrepreneur ni bawk, Nahakpam Shanta chuan Sangailand Farmers Producer Company leh Imphal West Farmers Producer Company-te nen thawhhona ṭha tak an neih avangin state dangah hlawhtling takin Chak-hao chu an thawn chhuak thei niin a sawi a, 20 MT chu Europe lam thawn thlak turin hmalak mek a nih thu an sawi.

Agriculture department hnuaia hmarchhak tana hma la tura duan bik, Mission Organic Value Chain Development for North East Region (MOVCD-NER)-a an Project Officer, Dr Kh Nimaichand chuan loneitute chu buhfai dum thar chhuah kawngah ṭan la zel turin a fuih a, Chak-hao an chin laiin a hlutna leh ṭhatna a hloh loh nan ṭan la turin loneitute chu a fuih a ni. Manipur chuan Chak-hao thar chhuaka hralhna kawngah hmabak eng tak a nei niin a sawi a, a chinna hmun pawh state chhungah a tam tawh hle niin a sawi bawk.