MGNREGA kalpui tha zingah hmarchhak langsar

Mahatma Gandhi National Rural Employment Guarantee Act (MGNREGA) hnuaiah Tripura chu India ram state zinga kalpui ṭha ber niin, kum 2015-16 chhung khan ni 100 inhlawhna hi 94.46% an kalpui a ni. He scheme hi state hrang hrang hrangah kalpui a ni a, a hlawhtlinna hi chawhrualin 48.51% a ni.

Rural development ministry report-in a tarlan dan chuan Mizoram (68.55) chu he scheme kalpui ṭha ber dawttu a ni a, Sikkim (66.97) chu ti ṭha pathumna a ni. Hetih lai hian hmarchhak state pahnih Arunachal Pradesh (27.47%) leh Manipur (15.65%) te chu he scheme kalpui ṭhalo ber zingah an tel thung. Ni za inhlawhna tia sawi, MGNREGA hi chhungkaw tam tak chuan an ṭangkaipui hle a, a bikin hmarchhak state ten an chhawr ṭangkai viau nia tarlan a ni.

UNDP Global Human Development Report chuan MGNREGA chu khawvel huap pawha scheme kalpui zingah, mipuiten an chhawr leh ṭangkaipui ber pawl niin tarlan a ni. Bangladesh-a Rural Employment for Public kalpui te, Argentina-a Jefes De Hogar leh Nepal-a Karnali employment programme te ai pawhin a hlawhtling zawk niin ministry chuan a tarlang.

Tripura bakah hmarchhak state dang te hian state mal angin scheme an kalpui meuh lo a, sorkar laipui aṭanga scheme duan hrang hrang te chu an innghahna a ni. Tripura (Central) University Rural Management and Development Department hotu Jayanta Choudhury chuan, "Tripura-ah hian sorkar ṭha tak a din avangin sorkar laipui scheme reng reng ṭha taka kalpui a ni a, MGNREGA pawh hi ṭha taka kalpui niin, mipuite chuan an chhawr hle a ni" a ti. 'Rural development in the northeastern states' tih lehkhabu lo ziak tawh Choudhury hian centrally sponsor scheme (CSS) te chu dik taka kalpui a nih chuan hmarchhak state pariat-a mihring maktaduai 45.58 chuang zet te tan hian hna leh hamṭhatna tam tak a keng tel a n, a ti bawk.

Tripura Rural Development and Forest Minister Naresh Jamatia chuan MGNREGA chu scheme ṭha tak a nih thu sawiin, a bikin hmarchhak state tan chuan a hlu hle a ni, a ti. "Sorkar laipui aṭanga MGNREGA hnuaia sum te chu a hun takah hmuh ni ṭhin se chuan hei ai hian mipui ten kan chhawr a beisei awm zawk a ni", a ti bawk.

MGNREGA hi Congress kaihhruai United Progressive Alliance sorkar chuan February 2006 khan bul a lo
ṭan tawh a ni. He scheme hnuaiah hian thingtlang khuaa chhungkaw tin te chu sorkar kum khat chhungin ni 100 inhlawhna siam sak tur an ni a, a nihna ang taka kalpui erawh a ni lem lo. A tum ber chu MGNREGA sum hmanga hmun kilkhawr leh chengker zawkah te inkalpawhna siam a, mipui ten an
ṭangkaipui theih tura kalpui a ni.

Report-a tarlan a nih dan chuan MGNREGA hi Gram panchayat 257,847-a block 6,858 leh district 661-ah kalpui mek a ni. Hetih lai hian kum 2015-16 chhung khan panchayat 40,000-ah chuan mumal taka kalpui a ni lo a, chung state te chu Chhattisgarh, Gujarat, Haryana, Maharashtra, Punjab, Uttarakhand leh Uttar Pradesh te an ni. Union rural development ministry tarlan dan chuan kum 2014-15 chhung khan he scheme hlawhtlinna hi chawhrualin 40.17% a ni a, 2013-14 aiin a hniam zawk. Kum 2009-10 kha he scheme kalpui a nih chinah a hlawhtlin ber ṭum niin 54% a tling phak. Tripura Communist Party of India-Marxist chuan sorkar kum khat chhunga ni 100 inhlawh chu ni 150-ah tihsan an duh thu an sawi a ni.