Rophul Marak-an Congress a thlawp dawn

Meghalaya independent legislator, Rophul S. Marak chuan Ningani khan thuchhuah siamin Tura Lok Sabha seat a chuh dawn lo tih sawiin, Congress party a thlawp a dawn tih a sawi.

Rophul Marak hian Thawhlehni khan Parlia-mentary Secretary a nihna chu a kalsan a, mi tam tak chuan Tura Lok Sabha seat a chuh dawn niin an ngai. Mahse Marak chuan a chhungte leh mi ṭhenkhat thurawn ngai pawimawhin chuh a tum lo tih a sawi chiang ta a ni. Lok Sabha Speaker Purno A. Sangma chu March 4 khan speaker a nihna term hi hmang zoin a thi a, tunah hian a aiawh thlang turin an inbuatsaih mek a ni.

Marak hian Congress candidate, Chief Minister Mukul Sangma nupui Dikkanchi D. Shira chu a thlawp dawn tih sawiin, a chak ngei theih nan theih tawp chhuahpui a tum thu a sawi. Parliamentary Secretary a nihna a kalsan chhungchang zawhna chhangin Marak chuan, "Banna hi chief minister hnenah ka thlen a, mahse Mukul Sangma chuan ka banna thehluh hi a la pawm lo a ni" a ti. Marak banna hi pawm a nih rih loh avangin Parliamentary Secretary a la ni reng a ni. Marak hian a nihna a bansan chhan hi congress a thlawp duh vang niin sawi a awm bawk.

Tura Lok Sabha seat chuh tur hian Meghalaya Chief Minister Mukul Sang-ma-a nupui Dikkan-chi D Shira leh PA Sang-ma fapa Conrad K Sang-ma te chuan Nilaini khan hming an pe lut a, inkhing tawk viau turah ngaih an ni. Chak an in rin thu candidate pahnih te hian sawi ve vein, mipuite tana theih tawp chhuah an tiam a ni.