Ramri-ah Manipur buai

Indo-Myanmar border chuan tunlai hian ngaihven a hlawh thar hle a, ramri depa awm Manipur-a thingtlang khaw 40 vel zet chuan Committee dinin, ramri hi tlawh an rem tilo tih an sawi.

Chandel-Ukhrul Indo-Myanmar Border Land Protection Committee general secretary Ngachomi Ramshang chuan sorkar agent te chu helaiah hian an kal rem tihsak an nih thu a sawi. Committee hi Ukhrul leh Chandel district-a thingtlang khaw 40 aiawh te an ni a, an ram chu Myanmar kutah chan mai an duh loh thu an sawi.

Information Centre for Hills Areas Manipur (ICHAM) chuan ramriah hian survey a nei tawh a, boundary pillar te chu an endik a ni. He lai bawra cheng khaw ṭhenkhat chuan an ram te chu Myanmar lakah an chan mai ang tih an hlau hle a ni. Ramshang chuan vanduai thlak takin Manipur ram kum 1949-a sq km 22,437 chu sq km 22,327-ah kum 1981 khan a tlahniam tih sawiin pawi an tih tak zet thu a sawi. India chuan km 1,624 zeta thui Indo-Burma border chu a hung a, hei hi dan loa ralthuam tawlh, ruihhlo lakluh leh thawn chhuah leh dan loa ramri kan ṭhin te venna atana a siam a ni.

Assam Rifles chuan Manipurah hian km 398 zet-a thui Manipur-Myanmar border chu an veng ve reng a, heti chung hian harsatna an tawk reng bawk. Hemi chungchangah hian Myanmar Home Ministry pawh biak an ni tawh a ni.

Manipur Chief Minister Okram Ibobi Singh chuan assembly-ah March thla khan ramri chungchangah hian buiana a awm an hriat loh thu a sawi ve thung. Mahse Information Centre for Hills Areas Manipur president N. Rajendro chuan Chief Minister hi hriattir a nih tawh thu sawiin, thlalak leh video nen an pek thlap thu a sawi. Nilaini khan Assam Rifles mi pathum te chu Moreh-a bom puakah hliam an tuar a ni. Ramriah hian buaina a chhuak fo nia sawi a ni a, a bul vela cheng te chuan sorkar chu hma la turin an nawr ve reng bawk.