Leimin vangin Arunachal-ah 16 thi

Arunachal Pradesh-a ruah nasa taka sur chuan chhiatna a thlen mek a, Tawang aṭanga km 5 vela hla Famla-ah lei nasa taka a min avangin mi 16-in nunna an chan.

Leimin hi Pathianni zing lam dar 3 vela thleng a ni a, thi te hi Assam aṭanga helai hmuna hnathawka khawsa te an ni.

Vanduaina tawkte chhanchhuah hna hi thawh nghal a ni a, mihring leh khawl hmanga thawh a ni. Police, Army leh GREF te chuan leimin then fai hna hi an thawk ve bawk. Arunachal-ah hian ni eng emaw zat chhung chu ruah a sur tawh a, hmun hrang hrangah lei a min nasa hle. Report-a a lan dan chuan chenna in tam tak a chhiat bakah sorkar building ṭhenkhat chu luah ngam lohin a awm mek a ni.

Lei min hlauhawmna hmuna mite chu chen lailawkna tur siam sak an ngai hial a ni. All India Radio chuan mipuite chu fimkhur turin a chah ve reng a, Police control room leh district emergency operation centre te chu inralring reng tura hriattir an ni bawk. Damdawi lam thawkte pawh chhiat tawh thulha che chhuak mai thei tura hriattir an ni a, ruah sur hi a reh mai loh avangin chhiatna tam zawk a thlen a hlauhawm hle. Tunah hian khaw ṭhenkhat chu an dinhmun a him lo hle a, tuilian chuan harsatna siam chho ṭanin, Pasighat khua chu tuilian hian a chim tawh nghe nghe a ni.