Manipur : Kuki zirlai pawlin Swarajya article an sawisel

Kuki Students' Organisation General Headquarters (KSO-GHQ) chuan tunhnaia Swarajya magazine-a article tihchhuah chu na takin an sawisel. He article-ah hian Meitei-te'n Manipur buaina avangin an tuar nasa hle niin a inziak a, chu chu KSO hian thu dik tawk lo a nih thu an sawi.

KSO-GHQ chuan Swarajya article chu midang rilru hruai kawi thei a nih thu sawiin thu dik lo tam tak a awm a ni, an ti. He article hian hnam pahnihte inkarah chi ṭha lo a tuh thei niin an sawi a, buaina tirehtu ni loin tipunlun zualtu a nih thu an tarlang. He thuziakin Kuki-te chu Meitei-te hamṭhatna dawn ve tur daltu anga a tarlang chu KSO chuan chhang letin, Kuki hnamte chuan hetiang zawnga hma an lak ngai loh thu an sawi a, Kuki hnam a puhnaah hian ṭanchhan mumal tak tar lan tur a neih loh thu an sawi bawk.

Swarajya thuziakah hian Meitei-te chu Kuki-te tihduhdahna avangin relief camp hrehawm takah an awm mek tia tarlan a ni chu KSO chuan pawi an ti a, hei hi Kuki hnam tihmualpho tumna mai a nih thu leh, thuthar thehdarhtute chu thu lai la taka thuziak ṭhin tura an duh thu an sawi zui bawk. Swarajya chu hetiang thuziak dik lo tak an chhuah avang hian ngaihdam dil tura an duh thu an tarlang a, hetiang thuziak ṭanchhan mumal nei lo hi chhuah ni tawh lo se an duh thu an sawi tel bawk a ni.

KSO chuan Manipur chhunga buaina tenau thleng ṭhin chu thuziak hmanga chi leh chi inkara buaina chawk chhuak thei zawnga ziak lo turin a chah a, hetiang thuziak hian hnam hrang hrang inkarah buaina tam zawk a chawk chhuah thei a ni, an ti. Thuthar thehdarhtute chu an thuchhuahah fimkhur tura an duh thu tarlangin, thu an ziak dawn a nih chuan buaina chawk chhuak thei zawng ni loin, thu dik leh rintlak ṭanchhana ziak zawk tura an duh thu an sawi.