Union Home Minister-in Assam a tlawh dawn

Lok Sabha inthlan lo awm tur atana campaign turin union home minister Amit Shah chuan vawiin hian Assam a tlawh dawn.

Inthlanpui hmachhawn turin Assam chu a inpuahchah mek a, hmarchhak state zinga Lok Sabha-a seat ngah ber Assam-ah hian BJP chuan ṭan an la hle a ni. Assam-ah hian Lok Sabha seat 14 awmin, kum 2019 inthlanah khan BJP chuan seat 9 lain Congress chuan seat 3 an la ve bawk a ni. Assam-ah hian inthlanpui hi chhawng thuma neih a ni dawn a, April 19, April 26 leh May 7-ahte vote thlak a ni ang.

Union home minister hi April 7 leh 8 a zin tura ruahman ni mah se, remchan zawkna avangin Assam a tlawh hun tur hi vawiin, April 9 atana sawn a ni. Amit Shah hian a cham chhungin Lakhimpur, Sonitpur leh Dibrugarh-ahte campaign-in hun a hmang ang. Ruahmanna hmasaah chuan Hojai, Lakhimpur leh Gohpur-ah Amit Shah hi thusawi tura tih a ni a, a kal hun tur tihdanglam a nih avangin heng hmunahte hian hun a hmanpui dawn ta lo a ni.

Amit Shah bakah hian sorkar laipuia hotu lian dangte pawhin Assam an la tlawh dawn niin Assam tourism minister Jayanta Mallabaruah chuan a sawi bawk. Prime minister Narendra Modi pawhin April 17 hian Assam hi a tlawh ve dawn bawk a, a cham chhung hian Nalbari-a rally neih turah thusawi tura ruahman a ni.