Meghalaya-a ILP hman a nih loh chhanah VPP-in MDA a puh

Meghalaya-a Voice of the People Party (VPP) chuan an state-a rorel lai, Meghalaya Democratic Alliance (MDA) hnuaia National People's Party leh a thawhpuite chu an state chhunga Inner Line Permit hman a nih loh nana hma la ṭhinah a puh. MDA hian vawi tam tak Meghalaya tana ILP hman a nih theihna tura hmalakna chu an lo dodal tawh niin VPP chuan an tarlang.

Batskhem Myrboh, VPP thupuangtu chuan MDA sorkar chu an lo chet tawh dan avangin rin harsa a tih thu a sawi a, kum 2023 aṭang tawh khan MDA sorkar chuan ILP hman a nih theih nana hmalakna chu a thlawp ngai lo a ni, a ti. Tunhnai maia Meghalaya Legislative assembly-in ILP hman a nih theih nana resolution an pawmah pawh MDA MLA-te chuan tihtak zetna an tlachham niin a puh.

Myrboh chuan Meghalaya-a ILP hman a nih ve theih nan state sorkar mai bakah sorkar laipui pawh hma la ṭha tawk lohah puhin, ILP hman a nih theih nana hmalakna tak tak a awm ngai lo niin a sawi. ILP hman a nih theih nana tihtur ṭul tia hma la turin MDA chu a ngen a, Meghalaya hma hun atan he thil a pawimawhzia hriaa ngaihthah lo tura a duh thu a sawi a ni.