Hel inpe tan sorkar laipuiin sum ṭhahnem tak ruahman : Tripura CM

Tripura chief minister Manik Saha chuan Nationalist Liberation Front of Tripura (NLFT) helpawl mi leh sa inpete tan sorkar laipuiin Rs. vbc. 100 a ruahmansak tih a puang.

Chief Minister chuan Gabordi, West Tripura district-a thu a sawinaah he thu hi a puang a ni. Saha chuan prime minister Narendra Modi chu buaina awmte chingfel tura hma a lak ṭhin avangin a fak hle a, Modi kaihhruai sorkar hnuaiah hmarchhak state-a helpawl hrang hrangte nen inremna thuthlung 12 lai an ziak tawh niin a sawi. Hetiang hlawhtlinna an chan theih avang hian PM Modi chu a fak a, hmarchhak huam chhunga remna leh muanna a awm theih nan a thawh hlawk tak zet tih a sawi. An state chhunga Tipra Motha Party nena an thawh dunna leh Bru chungchanga BJP hmalak dan chu remna leh muanna awm theih nana an thawh ṭhatzia sawi fiah nan a hmang bawk.

NLFT hi Bangladesh-a inkhuar helpawl niin Tripura state chhungah an chetla ber thung a ni. Sorkar laipuiin sum a pek chhuah tur hi Tripura ram leilung fate hmasawnna tura ruahman niin, NLFT mi leh sa remna leh muanna duha inpe zawng zawngte pawh a huam tel a ni.