Assam : Atishi hoin AAP-in kawng an zawh

Aam Aadmi Party (AAP) hruaitu pawimawh leh Delhi education minister, Atishi Marlena hoin Thawhṭannni khan Duliajan, Assam-ah kawng zawh a ni. Atishi hian helai biala ding tur, AAP candidate Manoj Dhanowar a campaign-pui a ni.

Kawng zawhnaah hian AAP thlawptu ṭhahnem tak an pung khawm a, Atishi chuan kal khawmte hmaah thu sawiin AAP hotu, Arvind Kejriwal chu Assam mipuite chuan an duhsak ṭhin hle tih a sawi. Guwahati Municipal Corporation leh Tinsukia Municipal Board inthlanah an duhthusamin thil thleng lo mah se, Assam mipuite'n Kejriwal chunga rinna an nghahzia an tilang tho a ni, a ti.

Atishi chuan an hotupa chu zirna in ṭha neih leh damdawi in ṭha neih vei em em tu a ni tih a sawi a, hemi bakah hian hmeichhe tan bus chuan man chawi ngai lo tura hmalak leh ṭhalaite tana eizawnna nghet siamsak chu an tum ber a nih thu a sawi bawk. Assam-ah chuan zirna in chhe tak tak a tam thu te, damdawi inte pawhin damdawi pawimawh kawl loh an ngah thu a sawi a, thingpui huana hnathawkte dinhmun chhiatzia a sawi lang tel bawk. BJP chuan inthlan hmain thutiam ṭha tak tak nei ṭhin mah se, an thutiam hlen turin hna an thawk ngai lo niin a sawi.

Delhi education minister chuan AAP-in Assam-a zirna in, damdawi in leh thingpui huana hnathawkte dinhmun chawikan an tum thu a sawi a, thingpui chingtute tan minimum support price siamsak an tum niin a sawi bawk. Dibrugarh biala AAP candidate vote vek turin mipuite chu a sawm a ni.