CAA kaltlanga khua leh tui nihna dil pakhat chiah awm : Assam CM

Assam chief minister Himanta Biswa Sarma chuan Assam aṭangin Citizenship Amendment Act (CAA) dan hnuaia India khua leh tui nihna diltu mi pakhat chiah a la awm tih a sawi.

Chief Minister Sarma hian thuthar thehdarhtute a kawmnaah CAA dan hnuaiah Barak Valley aṭangin mi pakhat chauhin khua leh tui nihna nei turin dilna a theh lut tih a sawi a ni. CAA dan chu awm lo ang mai a nih thu sawiin CAA dodalna pawh thil hriat fuh tawk loh vang a nih thu a sawi bawk. Sarma chuan CAA dodaltute insawi fiah hun a thleng ve tawh thung dawn a ni, a ti.

Assam CM chuan,"Ni tam tak liam hnuah pawh Assam aṭang chuan mi pakhat chauhin India mi nih nan dilna a theh lut a ni. CAA dodaltute'n mi tam tak an rawn lut tur anga an sawi nen chuan a inpersan hle a ni" a ti. Sarma chuan CAA hlau tura inzirtir chu mi thluak sukna mai a nih thu sawiin heng mite thusawi dik lohzia chu nemnghehin a awm zel niin a sawi. Bengali ṭawng hmang an tamna, Sonari bialah pawh tu mahin khua leh tui nihna dil an la awm loh tih a tarlang.

Hetih lai hian Supreme Court chuan CAA laka Coordination Commmittee-te'n thubuai an theh luh chu nimin aṭang khan a ngaihtuah ṭan a ni.