Sorkar laipui leh State thawh dunna ṭhat vangin Manipur buainain ziaawm lam a pan : PM Modi

Prime minister Narendra Modi chuan chi leh chi inkara buaina chhuak vanga Manipur-a tharum thawhna tam tak a thlen hnuah, buaina chuan ziaawm lam a pan tawh niin a sawi. Modi chuan buainain ziaawm lam a pan chhan chu sorkar laipui leh state thawh dunna a ṭhat vang tih a sawi zui bawk.

Prime Minister chuan,"Parliament-a ka sawi tawh ang khan Manipur buaina chingfel tur hian kan roreltu ṭha leh sorkar chakna hman a ni a, sorkar laipui leh Manipur sorkar ṭangrualin a hun taka hma an lak avangin state chhung buaina pawh a ziaawm tawh hle" a ti. Buaina a nasat zual laia union home minister Amit Shah-a'n Manipur a tlawh leh hnam hrang hrang hotute a titipui chuan rah ṭha tak a chhuah niin Modi chuan a sawi a, sorkar laipui chuan Manipur mamawh tihpuitlin kawngah hma a la reng a ni, a ti.

Eptu lamin Manipur buaina chungchanga ngawih chuh tlata Prime Minister an puhna chu chhangin, Modi chuan a kaihhruai sorkar chu remna leh muanna a awm theih nan hma an la reng a, India ram pumpui chu Manipur lamah a ṭang reng dawn niin a sawi.

Congress hruaitu langsar tak Jairam Ramesh chuan Manipur buaina chungchanga ngawi tlat leh vawi khat mah la tlawh lotu Modi chu na takin a sawisel ve bawk. BJP lamin Manipur buaina lak ata chhanchhuaktu chu Modi a ni tia an sawi chu thil zahthlak tak a nih thu sawiin, Manipur chu buaina lak ata a la tal chhuak lo niin a sawi. Ramesh chuan,"Prime Minister hian minute thum chhung bak Manipur chungchangah hian thu a la sawi lo a, thla 11 lai buai tawh mah se, vawi khat mah a la tlawh lo bawk. Manipur chief minister emaw MP emaw MLA emaw pawh buaina chhuah hnu hian a la hmu lo a ni" a ti.