Sikkim CM hlui Pawan Chamling-a'n beih a tawk

Sikkim chief minister hlui Pawan Chamling chu Namchi-ah beih a nih thu an party, Sikkim Democratic Front (SDF) chuan an tarlang

Pawan Chamling hian Namchi bazar-a puja hmannaah a tel hnuin Kishan bazar-ah meeting nei tura a kal leh chu beih a tawk ta niin SDF chuan an tarlang. Chamling beitute hi an elpui Sikkim Krantikari Morcha (SKM) mi leh sate ngei nia an hriat thu an sawi bawk.

SDF chuan mipui tam tak pung khawm chuan Chamling kalna tur tibuai zawng leh a taksa lama harsatna tawk zawngin an hotupa chu an rawn nek buai niin an sawi a, a bul hnaia police leh midang awmte tan pawn inrawlh ve ngaihna awm lo hialin an nek buai niin an sawi. Hetiang thil a thlen avang hian SDF mi leh sate chu an hotupa Chamling chhan turin an thawk chhuak a, an zinga tam tak chuan kut an tuar a, ṭhenkhat chu damdawi in lama enkawl ngaite pawh an awm hial nia sawi a ni.

Hetiang thil a thleng hi pawi an ti takzet a, democracy beihna ang hialah an ngai tih SDF chuan an sawi. Sikkim CM PS Tamang Golay thlawptute chu misual rual ang maia che ṭhin leh tharum thawh hreh lo an nih thu an sawi tel bawk.