MHA-in Manipur aṭangin central force ṭhenkhat la chhuak dawn

Sorkar laipuia Ministry of Home Affairs chuan Manipur-a central force awm mek, Central Armed Police Forces (CAPF) sipai 5,000 lak chhuahna turin thupek a tichhuak.

CAPF lak chhuah turte hi company 50 an ni dawn a, heng zinga a tam zawk chu Central Reserve Police Force (CRPF) leh Border Security Force (BSF) an ni dawn a ni. MHA hian India ramin inthlanpui a hmachhawn turah hian CAPF tam tak ramchhung hmun hrang hrangah duty tura dah a tum a, hei vang hian Manipur-a awmte pawh a la chhuak ṭhen dawn a ni.

Manipur hi nikum May 3 aṭang khan buai ṭanin vawiin thleng hian buaina chuan ziaawm lam a la pan thei lo a, buaina avanga nunna chan pawh mi 200 zet an tling tawh. Manipur-a buaina a chhuah hnu hian Indian Army leh CAPF sipai 36,000 chuang thawn luh an ni. Central sipaite hi Imphal phairuam leh Manipur tlang rama chengte'n indaidanna an siamna hmunah an duty ṭhin a, hnam pahnih inkara buaina chhuak tur an veng ṭhin a ni.

MHA hotu pakhat chuan Manipur police-te chu dan leh hrai kengkawh turin tihtur tam zawk an nei tawh dawn niin a sawi a, inthlanna dik leh felfai a awm theih nan ṭha takin police-te chuan an thawh a ngai dawn a ni, a ti. Manipur hian Lok Sabha seat pahnih neiin April 19 leh April 26-ah vote thlak a ni ang.