Nehru-a'n Assam leh Arunachal-te China lakah a humhim ngam lo : Amit Shah

Union home minister Amit Shah chuan inthlanpui lo awm tur denchhena hmarchhak a tlawh ṭuma Lakhimpur-a thu a sawinaah, India leh China ram inchuh chungchang a sawi chhuak. Modi kaihhruaia an sorkar hnuah China chu ramriah a huangtau ngam lo niin a sawi.

Amit Shah chuan kum 1962-a India leh China an indo ṭum khan, khatih laia prime minister Jawaharlal Nehru chet dan a dem thu a sawi a, China ral lian lakah Assam leh Arunachal chu humhim ngam loah Nehru chu a puh a ni. Amit Shah chuan kha thil thleng kha state pahnih a mipuite'n an hre reng tawh dawn a ni tiin, Modi sorkar hnuaiah chuan ram inches khat pawh China lakah an hloh loh thu a sawi zui bawk.

Ramri buai chinfel leh venhim kawngah BJP sorkar chuan an thawk ṭha hle tih sawiin Bangladesh nena ramri buai an neih chinfel a nih bakah Indo-Bangla ramri aṭanga dan loa India ram lut ṭhinte tihtawp nan ramri chu ṭha taka venhim a nih thu a sawi. Assam chu hmarchhaka hmasawnna a awm theih nan a pawimawh hle a, sorkar laipui pawhin Assam hmasawn nan theihtawp an chhuah zel dawn a ni, Shah chuan a ti.

Defence minister, Rajnath Singh chuan tunhnaia Arunachal-a hmunhma hming ṭhenkhat China-in a thlak ringawt chu na takin a sawi sel ve bawk. Namsai, Arunachal-ah Thawhlehni khan thu sawiin, hming thlak ringawt vangin Arunachal chu China ta a nih phah lo niin a sawi. Singh chuan ram ṭhenawmte nen inlaichinna ṭha neih chu an duh ber ni mah se ,India ram inchhuan ve-na tihniam thei zawnga chet lakna awm chu na taka chhang let turin India chuan theihna an nei tih a sawi.

Rajnath Singh chuan Modi sorkar chuan hun liam taa ramri lama thil lo tihsual tawhte siam ṭhat hna a thawk mek tih sawiin ramri a hmasawnna ruhrel din nan hna an thawk tih a sawi. Arunachal huam chhunga India leh China ramriah pawh hmasawnna hna hrang hrang thawh reng a ni, a ti. Arunachal mipuite chu China nen buaina an neih changa huaisen taka an beih let ṭhin avangin a fak tel bawk.