INDI Alliance hnehna chu Nagaland aṭangin a inṭan ang : J Ramesh

All India Congress Committee (AICC) general secretary, Jairam Ramesh chuan kumin inthlanpui neih tura eptu ṭangrual pawl, INDI Alliance hnehna chu Nagaland aṭangin a inṭan dawn, a ti.

Jairam Ramesh chuan Thawhlehnia thu a sawinaah Nagaland chu Lok Sabha seat khat chauh awmna ni mah se, ram pum huapa inthlakthlengna lo awm turah vote tin leh seat tin chu an pawimawh vek niin a sawi a, chuvanga inthlan campaign bulṭan nan Dimapur thlang a nih thu a sawi.

AICC GS chuan BJP chu bei zuiin, tihluihnain India chu impumkhattir tumah a puh a, India rama chin dan phung hrang hrang awmte chhawm nun zel chu Congress thil tum a nih thu a sawi thung. BJP chuan hun lo awm tura an tum ber chu ram pakhata ṭawng khat hmante, a ruala inthlan neihte, sakhaw pakhat vawnte leh hnam chin dan pakhata inchhunfinte chu an tum a nih thu a sawi.

Ramesh chuan Jammu & Kashmir inhung bikna Article 370 tihbo a nih hnuah BJP chuan hmarchhak state hrang hrang tana inhung bikna awmna Article 371 chu a bitum leh dawn niin a sawi a, Nagaland inhum himna Article 371 (A) pawh a him tawh lo hle a ni, a ti. Congress hotupa chuan sorkarna an chan chuan an tihtur hrang hrangte tarlangin remna leh muanna bakah hmasawnna chu Congress thupui ber a nih tur thu a sawi a, heng bakah hian khawtlanga dinhmun hniam zawkte chawikan pawh an tihtur pawimawh tak pakhat a nih tur thu a sawi a ni.