Manipur aṭanga sipai lak chhuah tumnain dodal a hlawh

Sorkar laipuia Ministry of Home Affairs (MHA)-in Manipur aṭanga Central Armed Police Force (CAPF) company 50 lak chhuahna tura thupek a tihchhuah chu Manipur chhunga chengte'n duh loin an dodal. MHA hian West Bengal-a duty tur sipai company 100 tirh luh a ngaih avangin Manipur aṭang hian sipai tam tak an pawt peng a ni.

Kuki hnam an lungawi lo

Kuki-Zo hnamte chuan Meitei nen an indaidanna aṭanga Border Security Force (BSF) lak chhuah tumna an duh lohzia an lantir a, Kamjong district-a Thawai Kuki khuaah BSF-te chhuak tur chu an dang a ni. Nilaini zan dar 6 vel bawr aṭang khan MHA thupek duh lohna hi an lantir ṭan tawh a, Tengnoupal district-ah pawh BSF lak chhuah dodalna chu thupek chhuah hnu lawk aṭangin an lantir bawk.

Mipuite chu kawng­puiah ṭhuin lirthei tlan tlang theih lohin kawngpui chu an dang a, BSF lak chhuahna thupek sût an phût a ni. Manipur chhunga buaina a reh hma chuan BSF-te chhuah chu an remti dawn lo niin an sawi a, BSF an chhuak a nih pawhin an aiawh tur security force dang dah turin an ngen a ni.

Mipuite chuan Meitei nena an inkalpawh tur vengtu ber, BSF an chhuak a nih chuan an khaw himna a derthawng thei niin an sawi a, an in leh lote chu Meitei lamin ralthuam nen an beih leh mai an hlau a ni. BSF chhuak tur dangtu zinga pakhat Hohoi Haokip chuan BSF lak chhuah an nih chuan an khuaa awm zui zel a him dawn loh avangin relief camp lamah insawn mai a ṭul dawn niin a sawi.

Meira Paibis-te'n sipai chhuak tur an dang

Manipur-a Meitei hmeichhe pawl langsar tak, Meira Paibis-te chuan MHA thupek a chhuah hnu aṭangin hmun hrang hrangah duh lohna an lantir ve bawk. Bishnupur district-ah mi ṭhahnem tak pung khawm chuan Nilaini aṭang khan kawngpui an dang a ni. Khaw hrang hrang aṭanga pung khawmte hian 169 CRPF G company battalion lak chhuah tumna an dodal a ni.

Sipai chhuah tum dang tura pung khawmte chuan hmun pawimawh tak tak bakah buainain a kiansan lohna hmuna duty ṭhin sipaite lak chhuah tumna awm chu an duh loh thu an sawi a, heng hmuna CRPF an duty ṭhin avang hian buaina a nasat vanglai khan nunna tam tak an chhan him niin an sawi. Mipui lungawi lote hi khaw hrang hrang; Kumbi, Saiton, Salankonjin leh Hayaikon aṭanga kal khawmte an ni.