Arunachal tana BJP manifesto 'Sankalp Patra' tlangzarh

Bharatiya Janata Party (BJP) chuan Nilaini khan Arunachal Pradesh assembly inthlan lo awm tur atana an thil tih tum tarlanna, 'Sankalp Patra' chu an tlangzarh. Arunachal assembly inthlan hi April 19-ah neih a ni dawn a, June 2-ah vote chhiar a ni ang.

BJP manifesto hi party national president Jagat Prakash Nadda chuan tlangzarhin sorkarna an chan hnua an tih tur hrang hrangte an tarlang. An thil tum ziah lan zingah Arunachal-a chengte mimal sum lak luh chu kum nga chhungin a leta tihpun te a ni. Hemi bakah hian kum 2047 hmain Arunachal chu hmarchhak state zinga sum leh pai dinhmun ṭha ber dawttua hlan kai leh, mimal sum lak luh sanna berah siam an tum thu an tarlang bawk.

Assembly inthlanah hian hnehna an chang a nih chuan ṭhalaite tan hna 25,000 siam an intiam a, state chhungah hmasawnna ruhrel hrang hrang din a nih tur thu tarlan a ni bawk. Hemi bakah hian hmeichhe naupang, nutling leh kuthnathawkte'n hamṭhatna an dawn theih nan scheme thar siam an tum thu an tarlang tel bawk.

BJP president JP Nadda chuan 'Sankalp Patra' chu Arunachal hmasawnna kawnga hruai zel an tumnaa kaihhruaitu pawimawh tak a ni dawn niin a sawi a, prime minister Narendra Modi leh AP chief minister Pema Khandu kaihhruaina hnuaiah BJP chuan Arunachal tan DTH model (Development, Transparency, Harmony) chu kalpui a tum tih a sawi.