NPP tibuaia puh VPP hotupa insawi fiah turin an ko

Meghalaya-a rorel lai National People's Party (NPP) chu Jaiaw-ah inthlan kaihhnawiha inhmuh khawmna an neih laiin Voice of People Party (VPP) mi leh sate chuan an lo tihbuai avangin VPP president Ardent Millier Basaiawmoit chu insawi fiah tura hriattir a ni.

East Khasi Hills-a thil thleng avang hian NPP chuan an meeting neih lai chu zo fel hman loin hmanhmawh takin an tihtawp phah nia tarlan a ni. VPP mi leh sate hian meeting nei lai NPP chu an lo au buai a, meeting pawh a hun hmaa tihtawp niin party pahnih mi leh sate hi an intibuai zui a ni. Hemi avang hian Shillong returning officer, SC Sadhu chuan VPP hotupa Basaiawmoit chu vawiin, April 12 ral hma ngeia insawi fiah turin a hriattir.

Sadhu chuan Election Commission-in March 16-a inthlan neih hun tur an puan hnuah Model Code of Conduct hman ṭan nghal a nih thu a sawi a, MCC-ah hian candidate-te chuan anmahni thlawptute chu party dang tibuai zawnga khawsakna thlawp lo turin a chah a ni, a ti.