Manipur Congress-in an state-ah NRC neih ngei an duh

Manipur Pradesh Congress Committee (MPCC) chuan thuchhuah siamin, union home minister Amit Shah chuan Manipur chhungah National Register of Citizens (NRC) kalpui ngei se an duh thu an sawi. Amit Shah hian April 14-ah Manipur a tlawh dawn a, chumi hunah chuan NRC kalpui ngei a tum thu sawi chiang turin MPCC hian an phut a ni.

MPCC working president Kh Debabrata chuan thuthar thehdarhtute a kawmnaah NRC chungchanga Congress ṭanhmun chu dik lo taka sawi chhawn a nih ṭhin thu a sawi a, Congress chuan CAA an thlawp loh thu sawiin, NRC chungchangah erawh a huam kim theih zawk nan rawtna an thlen tih a sawi. Mahse hei hi a ni lo zawngin BJP chuan an sawi chhawng leh a ni, a ti.

Amit Shah chuan kum 2019 khan ram pum huapin NRC neih a nih tur thu a lo sawi tawh a, mahse, a hnuah prime minister Narendra Modi-a kaihhruai sorkar hnuaiah, NRC chungchanga hmalak dan tur sawihona engmah a la awm lo niin a sawi thung. Ram hruaitu pahnihte thusawi a inkalh thu hi MPCC president chuan a sawi chhuak a, hei hian BJP chu an thil sawiah an thu tak lohzia a tilang a ni, a ti. Debabrata chuan union home minister-in Manipur a tlawh aṭanga ni 300 a liam hnuah chauh a tlawh leh chu sawisel bawkin, a intiam ang ngeia Manipur buaina chin felna tura ruahmanna Shah chuan a rawn neih a beisei thu a sawi.

MPCC hian tunhnaia PM Modi-a'n Manipur dinhmunin ziaawm lam a pan nia a sawi chungchangah, sorkar chu Manipur buainain ziaawm lam a pan ngei a ni tih fiahna tur document pholang turin a ngen bawk a ni.