Assam khaw ṭhenkhat Meghalaya-a rin luh a ni

Meghalaya chief minister, Conrad Sangma chuan Assam leh Meghalaya ramri buai chinfel a nih theih nana theihtawp chhuahtu tiin Assam chief minister Himanta Biswa Sarma chu a fak hle.

Meghalaya Chief Minister leh National Peoples Party president ni bawk, Conrad Sangma hian West Khasi district-a Athiabari khuaa inthlan lo awm tur atana a campaign-naah he thu hi a sawi a ni.

Sangma chuan Assam CM chu hmarchhak dinhmun hre chiang leh a taka thawk mi niin a sawi a, ramri buai chinfel a nih theih nan theihtawp a chhuah bawk niin a sawi. Assam CM hmalakna zarah Assam huam chhung ni ṭhin khaw ṭhenkhat chu Meghalaya state chhunga rin luh a nih tawh thu a sawi.

Chief Minister chuan Meghalaya ram chhunga khaw tam zawk rin luh a nih theih nan inbiakna an la nei reng tih sawiin, a hna hautak deuh mah se, khaw tam zawk rin luh belh an la tum thu a sawi. Meghalaya CM chuan Assam huam chhunga khaw tam tak chuan Meghalaya chhunga rin luh ve an duh thu a sawi a, hemi chinfel nan hian state pahnih ṭangkawpin ramri ṭhenhran dan tur en fiahna neih a ni, a ti.