MCC bawhchhiat vangin mi 5 suspend an ni tawh : Tripura CEO

Tripura Chief Electoral Officer chuan Model Code of Conduct (MCC) bawhchhia nia puh mi 15 lakah political party hrang hrangin complaint an theh lut tawh tih sawiin, March 16 aṭanga MCC hman a nih hnuah official panga an suspend tawh tih a sawi bawk.

Puneet Agarwal, Tripura CEO chuan official-te laka complaint lut reng reng chu anmahni enkawltu Returning Officer leh Assistant Returing Official te'n an chhui zui turin an kutah hlan ṭhin a nih thu a sawi a, thiam lohna an nei ngei tih an hmuh chhuahte chungah dan anga hmalak ṭhin a nih thu a sawi bawk. Tripura chhunga sorkar hnathawk ṭhenkhat chu political party-te nen inzawmna an neih vanga suspend tawk an awm bawk a ni, a ti.

"MCC bawhchhia nia puh an awm a, kan hnena complaint lut awmte chu en zui nghal a ni a, thiam lohna neite lakah dan anga hmalak ṭhin a ni. Tun dinhmunah sorkar hnathawk mi panga MCC bawhchhiat vangin kan suspend tawh a ni" Agarwal chuan a ti. Complaint theh luh dan kawng hrang hrang awm chu sawi langin, C-vigil, National Grievance Service Portal leh lehkhaa ziakin complaint a theh luh theih thu a sawi a, Election Commission of India hnenah report an theh luh ṭhin thu a sawi bawk.

Agarwal chuan mimal emaw media emaw hnen aṭangin MCC bawhchhia an awm thu an dawng a nih phawt chuan complaint mumal theh luh hun nghak loa an en dik mai ṭhin thu a tarlang. Tripura CEO chuan April 1 aṭanga chhiarin an state chhungah Central Armed Police Forces (CAPF) company 84 dah luh an nih tawh thu a sawi bawk a, inthlanna ralmuang, dik leh felfai a awm theih nan ngawrh taka hna an thawh thu a sawi a ni.