Manipur : Kangpokpi district-a buaina chhuakah mi pahnih an thi

Manipur-ah hun eng emaw chen buaina avanga nunna chân an awm loh hnuah Inrinni khan inkahna a thleng leh a, nunna chân pahnih an awm. Hei hi a zawna ni thum inkahna a thlenna a ni bawk.

Ralthuam nena inbei pawl pahnihte hi eng pawl nge hriatchian ni lo mah se, Meitei village volunteer leh Tribal volunteer-te ni ngeia hriat an ni. Moirangpurel khua, Imphal East district leh Kamu Seijang khua, Kangpokpi district-ah inkahna hi a thleng a, darkar khat leh a chanve chuang an inkap nia sawi a ni.

Sipaite'n inkahna hmun an thlen hnuah, pawl pahnihte hian a inbeihna hi an tawpsan zui ve nghal. He inbeihnaah hian State forces bulletproof lirthei pahnih chu kah chhiat a nih thu an tarlang. Inkahna hmun aṭang hian AK 47 rifle pahnih leh silai mu man a ni bawk.

Inrinnia inkahna avang hian Kamminlal Lupheng (23) leh Kamlengsat Lunkim (22)-te'n an nunna an chân a ni. Zirtawpnia Ishingchaibi khua, Thobual district leh Pengang Kuki khua, Tengnoupal district a inkahna thlengah erawh Meitei village volunteer pathum in hliam an tuar thung.

CoTU-in darkar 24 awh bandh an huaihawt

Committee on Tribal Unity (CoTU) chuan Inrinnia inkahna thleng avanga mi pahnihin nunna an chân avang leh, Zirtawpnia Gamgiphai a inhlawhfate Meitei lamin an kah avanga an lungawi lohzia lantir nan Sardar Hills, Kangpokpi district-ah darkar 24 awh bandh an huaihawt nghal.

Bandh hian nizan zanlai thleng a awh a, inkahna thleng duh lohna lantirna a nih bakah Meitei chet dan rawng tak duh lohna a ni bawk. Hemi bakah hian Model Code of Conduct (MCC) chu Meitei volunteer-te hian an bawhchhe lui ṭhin niin an tarlang tel bawk.

Tribal pawl lian ber pakhat, CoTu hian L. Songphel, Saichang, Bongjang, Kamu Saichang leh Bongbal Khullen khuaa inrawkna tenau thleng ṭhin chu Inrinnia inkahna atana inbuatsaih lawkna pakhat a nih thu an sawi. Imphal phairuam aṭangin ralthuam kengte Manipur tlang ram lamah an kal fo ṭhin tih sawiin, hemiah hian State Election Commission (SEC) chu a mawhphurtuah an puh bawk. Tribal-te chu Meitei laka en hrang ṭhin leh hleih nei taka an chunga ro rel ṭhinah SEC chu an puh a ni.