Assam chhunga LS bial 3-ah bak min el pha an awm lo ang : Assam CM

Lok Sabha inthlan hun a hnai chho zel a, boruak pawh a ṭang tawh hle tih party hrang hrang hotute thusawi aṭangin a hriat theih. Bharatiya Janata Party (BJP) chuan a zawna a vawi thum nan sorkarna siam leh ngei an tum a, campaign pawh an bei ngawrh hle.

Assam chief minister, Himanta Biswa Sarma chuan thuthar thehdarhtute a kawmnaah Assam chhunga bial 14 awmah BJP chuan bial pathumah bak elpui tak tak an nei dawn lo niin a sawi. Heng bial pathumah hian hnehna chan tumin thapui an thawh dawn niin a sawi bawk. Nagaon, Karimganj leh Dhubri bialah chuan party dang nen an inel ve dawn niin a sawi a, a bak dang zawngah erawh BJP tan hlauhthawn tur awma a hriat loh thu Sarma chuan a sawi.

Himanta chuan,"Kan inchhut lawk danin bial ngaah chuan awlsam takin hnehna kan chang ang, elpui tur dang vak kan nei lo. Mahse, Nagaon, Karimganj leh Dhubri bialah erawh inelna a sang hle ang. Bial dang la bangah chuan khingpui sawi tham kan nei lo thung," a ti.

Assam CM hian Jorhat Lok Sabha bial aṭanga MP ni lai, Gaurav Gogoi chu sawiselin, a bial ngaihsak tawk loah a puh. Jorhat bialin buaina a tawh ṭhin chu Parliament-a sawi chhuak ngai loah puhin Rhino kah chungchanga MP ngaihdan chu mak a tih thu a sawi tel bawk.