Tualthah hmang party tia CPI (M) sawitu BJP candidate ECI-in warning pe

Election Commission of India (ECI) chuan Tripura East Lok Sabha constituency-a BJP candidate, Kriti Devi Debbarman chu ṭawngkam mawi lo tak hmang tawh lo turin a hriattir.

Kriti hian thu a sawina pakhatah Communist Party of India (Marxist) party chu tualthat ṭhin party an nih thu a sawi a, a thusawi hi Model Code of Conduct bawhchhiatna a ni tiin CPI (M) hian Chief Election Commissioner Rajiv Kumar hnenah kar liam ta Nilaini khan complaint an theh lut. Hemi hnu hian ECI chuan BJP candidate thusawi hi MCC bawhchhiatna a ni tih an hriattir bakah hethiang thil sawi tawh lo tur hian an hrilh hre bawk a ni.

BJP candidate, Kriti Debbarman hi Tipra Motha dintu, Pradyot Debbarma farnu a ni a, Tripura Lal chhungkua thlah an ni. Kriti laka complaint lut hi uluk takin an en fiah tih Tripura East Lok Sabha biala Returning Officer, Saju Vaheed chuan a sawi a, finfiahna hrang hranga a lan danin Kriti hian MCC a bawhchhe ngei a ni, a ti. Hun lo awm turah hetiang thu sawi tawh lo turin Kriti chu an chah thu Vaheed chuan a sawi bawk.