Assam-ah thli leh ruah vangin mi pasarihin nunna chan

Assam-a thli leh ruah nasa taka thawk chuan hmun tam takah chhiatna a thlen a, hriat theih chinah mi pasarihin nunna an chan tawh. In leh lo tam tak chhu luah tlak lohin a awm mek a, thing tlu engṭ emaw zat a awm bakah, electrict ban tlu eng emaw zat a awm bawk avangin hmun ṭhenkhatah chuan eng pek theih a ni lo.

Philkhana Line of Namdang Tea Estate-a Margherita-ah chuan chhungkaw pakhat thing tluin an in a delh a, mi pathum an thih bakah chhungkaw member pali dangte chuan hliam an tuar bawk. Assam-ah hian hun eng emaw chen ruah sur vangin an lo buai tawh a, ni thum vel khua a ṭhat hnuah

Cachar leh a chhehvel dis-trict te chu Cyclone-in a nuai ve leh a ni. Silchar-ah hian thli tleh avanga thing tlu chuan in a delh a, mi pakhatin nunna a chan a ni. Alnee Tea Estate-ah pawh kum 50-a upa Bina Bhakta chu a chenna thing tluin a delh avangin nunna a chan a, amah bakah hian naupang pakhat leh midang pathum chuan hliam an tuar a ni.

Nagaon district-ah pawh thli leh ruah thawk hi a na hle a, sumdawnna hmun leh mimal chenna in eng emaw zat a chhia. Charaideo district-ah chuan tek tlain chhungkaw pakhat a deng a, mi pakhatin nunna a chan a, midang paliin hliam an tuar bawk. Report-a a landan chuan thli leh ruah bakah tek tla chu Nalbari district-ah a nasa hle a, thi leh hliam enge maw zat an awm a, an la pun belh mai theih thu an sawi. Chhiatna thleng hrang hrang vanga hmun tam takah inkalpawhna leh inbiak pawhna a ṭhat loh avangin report kimchang hriat theih a la ni lo a ni.

Arunachal-ah Cyclone tleh

Arunachal Pradesh-a Chang-lang district-ah chuan Cyclone na takin a thawk leh a, Diyun-ah nunna chan pahnih an awm. Thi te hi kum 14-a upa Kalasogi Chakma leh Avoipur khua-a nausen thla ruk mi a ni.

Cyclone tleh hun chhung hi minute 15-20 vel a ni a, ruah nasa taka a sur bawk avangin mipui te chu an mangang hle. Avoipur, Dumpani, Jyotipur, Shantipur, Bijoypur leh Diyun Town-ah te chuan in eng emaw zat a tichhia a, a thil tih chhiat hlut zawng hi hriat la ni chiah lo mah se vaibelchhe chuang turah ngaih a ni. Jairampur ADC Kento Riba chuan harsatna thlenna hmun te a tlawh nghal. Changlang District Deputy Commissioner S Miji leh ADC Bordumsa te chuan nunna chan awmna hmun Diyun an pan nghal a, mi pawimawh te nen meeting an nei nghal a, tui lianin a tihbuai mek Dumpani an tlawh nghal bawk. Arunachal Pradesh-ah hian tun hnaia ruah sur leh thil tleh avangin hmun tam takah harsatna an tawk a, lei min leh tui lian avangin hmun
ṭhenkhat chu tlawhpawh hleih theih lohin a awm a ni.