Tripura MLA thihna-ah court-in mi 12 thiam loh chan tir

Tripura Congress MLA Parimal Saha thihna chungchang local court-in a chhui zelna ah Inrinni khan mi 12 te chu thiam loh chantir an ni a, dam chhung lungin tang turin court chuan an chungthu a rel.

Parimal Saha hi April 7, 1983 daih khan a office-ah thah a ni a, a thih danah hian hel an inrawlh nia hriat a nih bakah politics a inrawlh ngei nia rin a nih avangin hun rei tak chhung chu political party hrang hrang ten inchirh theh nan an lo hmang tawh a ni. Tripura state Assembly Budget Session neih zawh takah khan he mi chungchang hi eptu party lam chuan sawi chhuak lehin inkhawm tihtawp a ngaih phah hial a ni.

West Tripura Additional District and Sessions Judge S B Datta chuan mi 12 te chu Sections 120B (criminal conspiracy) and 302 (murder) of IPC hmanga hrem an nih thu sawiin, midang panga te chu court-in an chung thu a ngaihtuah hnuah chhuah zalen an ni, a ti. Thiam loh chantir te chu Shasti Chakraborty, Uttam Saha, Mrinal Sengupta, Pradul Sengupta, Bijay Kumar Das, Kajal Roy, Abhoy Kanti Bhusan, Chinmoy Ghosh, Sukhendu Bikash Das, Babul Das, Sajal Kumar Sarkar leh Hiranmoy Ghosh te an nih thu a sawi bawk. Arun Kumar Saha, Chand Miah, Tapan Kumar Das, Satya Ranjan Das leh Uttam Kumar Saha te chu evidence a awm loh avangin court chuan a chhuah zalen ta a ni.

Tripura High Court Chief Justice, Justice Deepak Gupta chuan judicial magistrate meeting koin thubuai kum 30 chuang zet finfiah loa awm chu chhuichhuak tura hma la turin Law Secretary chu a hriattir a, report kimchang siam thuai turin a ti, a ni. Defence counsel Saradindu Chakraborty chuan High Court-ah appeal a tum thu a sawi ve thung. Charilam constituency MLA Parimal Saha leh a thurualpui Jiten Saha te hi Parimal office Tilla, Bishalgarh police station area-ah April 7, 1983 khan thah an ni. He thil thleng chhui a nih chhung hian inhnamhnawih ve nia rinhlelh zinga mi pasarih te chu an boral hman nghe nghe a ni.