Hmarchhak tan Quality Education for Disabled Children project

Hmarchhak huam chhunga rualbanlote quality education pek an nih theih nan sorkar laipui chuan project kalpui turin ruahmanna a siam mek.

Regional Action on Inclusive Education in North East (RAISE-NE) chuan tunah hian Sarva Siksha Abhiyan (SSA) hnuiah rualban lote zirna ṭha zawk pek an ni theih nan hian Assam-ah chuan kalpui mek a nih thu RAISE-NE Project Director Bibhudutta Sahu chuan a sawi.

Project hian Assam, Megha­laya, Manipur, Nagaland leh Tripura-a sorkar school leh sorkar hriatpui schhol te a huam phawt dawn a ni. Rualbanlo zirlai ten an zirlaipuite zir ang an zir ve theih nan leh a bika hamṭhatna siam sak chu he project-in a tum ber chu a ni. Rualbanlote chuan zirna-ah hian harsatna an tawh lohna turin a ṭanpui dawn a ni, Sahu chuan a ti. Rualbanlote tana special school siam sak an ni ang a, zirna leh hmanrua ṭha tak pek an ni ang.

RAISE-NE hian pawl hrang hrang a thawhpui a, Assam, Manipur leh Nagaland bakah Meghalaya pawl pali leh Tripura-ah pawl pathum thawhpui a nei mek a ni a tibawk. Assam bikah chuan district pangapanga - Jorhat, Kamrup, Sonitpur, Bongaigaon leh Dibrugarh te chu he project kalpuina tur hian thlan fel an ni tawh a, kalpui thuai theih beisei a ni. Infrastructure
ṭha leh rualbanlote pawhin an chhawr ṭangkai theih tur hmanrua te chhawp a ni ang a,heng hmangte hian zirna ṭha tak pek an ni thei dawn niin Coordinator of Shishu Sarothi Diba Nahim chuan a sawi ve bawk. Rualbanlote tan hian an kalna tur bik ramp siam a ni ang a, a bika siam inthiarna bakah an theihna pawchhuak thei tur ngaituahsak an ni ang.

Assam SSA Mission Director Thaneswar Malakar chuan he project hi kalpui an nghakhlel tawh tih sawiin, a nihna ang taka kalpui tum a ni, a ti. SSA chuan heng rualbanlote hi SSA school te tlawh a phalsak tur thu sawiin, an duh leh nuam tih zawng tihphal sak an ni ang a, chona thar an hmachhawn ve theih nan remchang siam sak an ni ṭhin tur thu a sawi bawk.

He project kalpui tur hi International agencie pathum - Christoffel Blinden Mission (CBM), Light for the World leh Liliane Fonds te chuan an thlawp thu an sawiin, a theih anga sum leh paiah pawn ṭanpui an inhuam thu an sawi ve bawk.