JNV sawn duh loh vangin nawrh huaihawt

Nagaland-a Kiphire-ah Jawahar Navodaya Vidyalaya (JNV)-a zirlai leh zirlai nu leh pa te chuan Inrinni khan lungawilohna an lantir. Kiphire-a Jawahar Navodaya Vidyalaya (JNV) hi Phek-ah sawn tura tih a ni a, hemi duh lo hian zirlai leh an nu leh pate chuan lungawi lohna an lan tir ta a ni.

Pungkhawmte hian Principal thar an duh thu au chhuahpuiin, JNV chu sawn chhuak lo turin an ngen a ni. Zirlaite chuan an hma hun tih chhiatsak lo turin thuneitute chu an ngen a, Deputy Commissioner hnenah JNV chu sawn chhuak lo turin an ngen a ni.

Kiphire DC hnenah hian JNV zirlaite chuan an harsatna hi an thlen a, April 28 khan an principal chuan zirlaite chu ko khawmin JNV chu Phek-ah sawn tur a nih thu min hrilh a ni an ti. Principal chuan facility duh anga a awm loh vang niin a sawi a, zirlaite chuan hemi chungchangah hian harsatna lian tham awma an hriat loh thu an sawi ve thung.

Zirlaite chuan tuna an principal ni lai chu nikum khan transfer order pek a ni tawh tih sawiin, tun thlenga transfer a la ni lo chu an hriatthiam loh thu an sawi. Kiphire-a JNV hi hmun danga JNV school dang te aiin, material a chhia niin an sawi bawk a, an principal chu sawn chhuak vat turin thu neitute an ngen a ni.

JNV Kiphire hi infrastructure a ṭhat loh bakah zirlai an tlem nia tarlan a ni a, staff quarter a tha lo hle bawk. ADC Kiphire, Dr Tinojungshi Chang chuan district administration chuan official order an la dawng lo tih sawiin, eng vanga sawn chhuah tum nge an nih an hriat loh thu an sawi ve bawk. Zirlai nu leh pa te pawhin Zirtawpni khan principal hi hemi chungchangah hian an hmu tih sawiin, official order hi Deputy Commissioner NVS Dr D.S Kumar chu hriattir a ni tawh niin a lo chhang a, a mah ngei pawhin a chhuahsan vat tur thu a lo hrilh niin an sawi bawk.